Home Blog Page 3

„ფერმერთა ასოციაცია“ „საქართველოს ტურიზმის ინდუსტრიის ალიანსს“ აგროტურიზმის მიმართულებით შეუერთდება

0

„საქართველოს ტურიზმის ინდუსტრიის ალიანსსა“ (GTIA) და საქართველოს ფერმერთა ასოციაციას შორის ურთიერთშეთანხმების მემორანდუმი გაფორმდა. ამის შესახებ ,,ინტერპრესნიუსს” „ფერმერთა ასოციაციიდან“ აცნობეს.

მათივე ინფორმაციით, „ფერმერთა ასოციაცია“ „ტურიზმის ინდუსტრიის ალიანსს“ აგროტურიზმის მიმართულებით შეუერთდება. მემორანდუმს ხელი დღეს „ფერმერთა ასოციაციის“ აღმასრულებელმა დირექტორმა თამარ თორიამ მოეწერა.

„საქართველოს ფერმერთა ასოციაცია“ აქტიურად ეწევა აგროტურისტული ობიექტების მხარდაჭერასა და პოპულარზაციას. COVID -19 დროს განსაკუთრებით მძიმე დარტყმა მიიღო აგროტურიზმის სექტორმა. „ფერმერთა ასოციაცია“ „საქართველოს ტურიზმის ინდუსტრიის ალიანსს“ სწორედ აგროტურიზმის მიმართულებით შეუერთდა. ჩვენი ასოციაცია გაერო-ს ქალთა ორგანიზაციასთან ერთად აქტიურად მუშაობს აგროტურიზმის საკანონმდებლო ინიციატივაზე, რომელიც სხვადასხვა შეღავათებსა და ბენეფიტებს ითვალისწინებს აგროტურიზმის ბიზნესისთვის. კანონპროექტის დამტიკიცების შემთხვევაში 2020 ტურისტული წლის სიმძიმეს მნიშვნელოვნად შეამსუბუქებს,“ – აღნიშნა თამარ თორიამ.

,,საქართველოს ტურიზმის ინდუსტრიის ალიანსი“ (GTIA) არის ტურიზმის ეროვნული ორგანიზაცია, რომლიც დაფუძნებულია საქართველოს ტურიზმის იდენტურობის პოპულარიზაციის განვითარებისა და კერძო სექტორში რეპუტაციის გაღრმავების მიზნით. მისია ასევე გულისხმობს სფეროს განვითარების საერთო სტრატეგიის დაგეგმვასა და განხორციელებას, სარეკლამო და ცნობადობის ასამაღლებელი ღონისძიების შეთავაზებისა და ორგანიზებას,რაც წარმოადგენს ქვეყანაში თუ მის გარეთ არსებული ტურიზმის სუბიექტების საერთო ინტერესს, ასევე მთავარი მიზანი საქართველოს ტურისტული პოტენციალის წარმოჩენა, ხარისხის ზრდა და სფეროს განვითარებაა. ინიციატივის მხარდამჭერი USAID-ის ეკონომიკური მმართველობის პროგრამაა (The USAID Economic Governance Program).

ალიანსის წევრები არიან: საქართველოს ფერმერთა ასოციაცია; საქართველოს გასტრონომიის ასოციაცია; ეკო ტურიზმის ასოციაცია; სასტუმროების და რესტორნების ფედერაცია; საქართველოს გიდების ასოციაცია; გასტრონომიული ტურიზმის ბიზნეს ასოციაცია; საქართველოს ტურიზმის ასოციაცია; ბიზნეს ტურიზმის ასოციაცია; საქართველოს შემომყვან ტურ-ოპერატორტა ასოციაცია; ტურიზმის ინსტიტუტი; საქართველოს ტურიზმის კავშირი; საქართველოს სერთიფიცირებული გიდების ასოციაცია; საქართველოს ტრადიციული რეწვის ასოციაცია; საქართველოს ახალგაზრდა გიდების ასოციაცია არიან,” – ნათქვამია ინფორმაციაში.

წყარო:ipn.ge

საქართველოდან ღვინის ექსპორტი შემცირდა – ქვეყნები, სადაც ქართული სასმელი გადის

0

2020 წლის იანვარ-მარტში საქართველოდან ღვინის ექსპორტი 9,6%-ით შემცირდა. სტატისტიკის სამსახურის მონაცემებით, წელს პირველ კვარტალში ქვეყნიდან 44,261 მლნ დოლარის ღირებულების ღვინო გავიდა, 2019 წლის ანალოგიურ პერიოდში კი 48,976 მლნ დოლარის ღირებულების.

შემცირებული მოცულობა ყველა ძირითად იმპორტიორ ქვეყანაში თანაბრად ნაწილდება, შესაბამისად, მკვეთრი კლება არცერთგან არ დაფიქსირებულა. ტრადიციულად, ექსპოტირებული ქართული ღვინის ყველაზე დიდი წილი, წელსაც რუსეთზე მოდის – 59,5%.

„ბიზნესპრენიუსი“ გთავაზობთ Top-10 ქვეყანას, სადაც 2020 წლის 3 თვეში ქართული ღვინო ყველაზე დიდი მოცულობით გავიდა: (წყარო: სტატისტიკის ეროვნული სამსახური)

  • რუსეთი – 26,356 მლნ დოლარი
  • უკრაინა – 5,094 მლნ დოლარი
  • პოლონეთი – 2,994 მლნ დოლარი
  • ჩინეთი – 2,058 მლნ დოლარი
  • ყაზახეთი – 1,225 მლნ დოლარი
  • ლატვია – 937,8 ათასი დოლარი
  • გერმანია – 795,7 ათასი დოლარი
  • ამერიკა – 691,9 ათასი დოლარი
  • ბელარუსი – 685,9 ათასი დოლარი
  • ლიეტუვა – 463,8 ათასი დოლარი

აღსანიშნავია, რომ გასულ წელს ათეულში იყო ესტონეთი, შარშან სამ თვეში ბალტიისპირეთის ამ ქვეყანაში 449,4 ათასი დოლარის ღირებულების ღვინო გავიდა. წელს კი ათეულში ის ბალტიისპირეთის მეორე ქვეყანამ – ლიეტუვამ ჩაანაცვლა. როგორც უკვე აღვნიშნეთ, ლიტუვაში 2020 წლის პირველ კვარტალში 463 ათასი დოლარის ღირებულების ღვინის ექსპორტი განხორციელდა.

წყარო:bpn.ge

ახალციხის აგრარული ბაზარი გაიხსნა

0

ახალციხის აგრარული ბაზარი გაიხსნა. ინფორმაციას გარემოს დაცვისა და სოფლის მეურნეობის სამინისტრო ავრცელებს.

„აგრარული ბაზრის შესასვლელში მოქალაქეთა თერმოსკრინინგი მიმდინარეობს, მოწყობილია დეზობარიერი, გამიჯნულია შესასვლელი და გამოსასვლელი, ბაზრის ტერიტორიაზე მომხმარებლები პირბადით გადაადგილდებიან, კონტროლდება სავალდებულო 2 მეტრიანი დისტანცია.

ბაზარში არსებულ მდგომარეობას, გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი, სახელმწიფო რწმუნებული ბესიკ ამირანაშვილი, ახალციხისა და ადიგენის მაჟორიტარი დეპუტატი გიორგი კოპაძე, ახალციხის მუნიციპალიტეტის მერი ზაზა მელიქიძე და სურსათის ეროვნული სააგენტოს წარმომადგენლები ადგილზე გაეცნენ.

თერმოსკრინინგის პროცესის მონიტორინგს ახალციხის მუნიციპალიტეტის მერიის თანამშრომლები ახორციელებენ და მოქალაქეებს სოციალური დისტანციის დაცვისკენ მოუწოდებენ.

სავაჭრო ობიექტის გახსნის გადაწყვეტილება, სურსათის ეროვნული სააგენტოს რეკომენდაციის საფუძველზე, საგანგებო მდგომარეობის დროს დაწესებული შეზღუდვების ეტაპობრივად შემსუბუქების ფარგლებში იქნა მიღებული. აღსანიშნავია, რომ ახალციხის აგრარულ ბაზარში, მისი დახურვიდან დღემდე, სხვადასხვა სახის ღონისძიებები განხორციელდა, ჩატარდა სადეზინფექციო სამუშაოები, დახლები განთავსდა შესაბამისი დისტანციის დაცვით, მოწესრიგდა ეზო და ავტომანქანების სადგომი“ – ნათქვამია ინფორმაციაში.

წყარო:commersant.ge

„ადგილობრივმა წარმოებამ უნდა შეამციროს წნეხი ფასებზე“ – ფაქტორები, რის გამოც პროდუქტები გაძვირდა

0

საქსტატის მიერ დღეს გამოქვეყნებული ანგარიში აჩვენებს, რომ COVID-19-ის პანდემიის ფონზე, გასული თვის განმავლობაში საქართველოში ფასების საერთო დონე 6.9%-ით გაიზარდა. ინფლაციის ფორმირებაზე ძირითადი გავლენა სურსათის ჯგუფში 16%-ით გაზრდილმა ფასებმა მოახდინა.

სურსათისა და უალკოჰოლო სასმელების ჯგუფში ყველაზე მაღალი ზრდა ხილისა და ყურძნის კატეგორიაში დაფიქსირდა(45,4%). ამასთან წინა წლის აპრილთან შედარებით რძე, ყველი და კვერცხი გაძვირებულია 23,2%-ით, შაქარი და სხვა ტკბილეული კი 16,9%-ით. ხორცსა და ხორცპროდუქტებზე მომხმარებელს 15%-ით გაზრდილი ფასის გადახდა მოუწია.

წლიური ინფლაციის ფორმირებაზე გავლენა ჰქონდა ჯანმრთელობის ჯგუფში ფასების ცვლილებასაც. კერძოდ, ბოლო ერთ წელიწადში სამედიცინო პროდუქცია 8,4%-ით, ამბულატორიული სამედიცინო მომსახურება კი 4,4%-ით გაძვირდა.

ანალიტიკოსების შეფასებით, სამომხმარებლო პროდუქტებზე ფასების მატება ძირითადად ლარის გაუფასურებამ და ინფლაციურმა მოლოდინებმა განსაზღვრა, თუმცა ინფლაციის ფორმირებაზე გავლენა ჰქონდა საქართველოს სავაჭრო პარტნიორი ქვეყნების მიერ ექსპორტზე დაწესებულ შეზღუდვებსაც.

„სურსათსა და უალკოჰოლო სასმელებზე ფასი გაიზარდა 16%-ით. ეს საკმაოდ მაღალი ზრდაა. ყველაზე მაღალი ზრდა დაფიქსირდა ხილის და ყურძნის კატეგორიაში, სადაც ფასები გაიზარდა ძალიან მნიშვნელოვნად.

ძირითადი ამხსნელი ფაქტორი ფასების ზრდის არის ეროვნული ვალუტის გაუფასურება. ამ წლის აპრილში წინა წლის აპრილთან შედარებით ლარი 18%-ით გაუფასურდა, პირველი 4 თვის განმავლობაში გვაქვს შედარებით მცირე 12%-იანი, მაგრამ მაინც გაუფასურება.

როგორც რძის, ისე ხილის კატეგორიაში საქართველო იმპორტზეა დამოკიდებული და მიუხედავად სახელმწიფოს მხრიდან სუბსიდირებისა, მაინც გაძვირდა ეს პროდუქტი. იყო სხვა ფაქტორებიც, კერძოდ ის შეზღუდვები, რაც დაწესდა ექსპორტზე სხვადასხვა სავაჭრო პარტნიორების მიერ.

ასევე მნიშვნელოვანია ადგილობრივი მიწოდების ჯაჭვში პრობლემები, გარკვეული შეფერხებები შეიქმნა გარკვეულ რეგონებში; მაგალითად ქვემო ქართლი, რომელიც ბოსტნეულის უმსხვილესი მწარმოებელია, ასევე სასოფლო სამეურნეო სამუშაოებიც შეფერხდა იგივე საშვების გაცემის საკითხის გამო. აგრარული ბაზრების დახურვაც ერთ-ერთი მნიშვნელოვანი კონტრიბუტორია.

ხილის და ბოსტენულის შეძენა ძირთადად ხდება აგრარულ ბაზრებზე და რომელიც ახლა დახურულია ამ პროდუქტებმა გადაინაცვლა მარკეტებში, სადაც ფასები ბევრად მაღალია, ვიდრე აგრარულ ბაზრებში. 

კიდევ ერთი ფაქტორია ინფლაციური მოლოდინები. მოსახლეობაში ფასების ზრდის გარკვეული მოლოდინები იყო, რის გამოც ქცევა იყო იქითკენ მიმართული, რომ შეექმნათ მარაგები, რაც კიდევ უფრო ზრდის წნეხს ფასებზე და იწვევს ფასების გაზრდას”, – აცხადებს ISET-ის უფროსი მკვლევარი სალომე გელაშვილი. 

მისი თქმით, მომავალი თვიდან ადგილობრივი წარმოება გაიზრდება და ბაზარზე შემოვა ადგილობრივი ხილი, ბოსტნეული, რაც შეამცირებს თურქეთიდან ხილისა და ბოსტნეულის იმპორტს. პროგნოზი კი არის ასეთი, თუ პარტნიორმა ქვეყნებმა არ გაამკაცრეს საექსპორტო პილიტიკას ადგილობრივმა წარმოებამ უნდა შეამციროს წნეხი ფასებზე.

წყარო:bm.ge


Soplidan.ge: ეპიდემიის გავრცელების შემდეგ გაყიდვების მასშტაბი 10-ჯერ გაიზარდა

0

ეპიდემიის გავრცელების შემდეგ გაყიდვების მასშტაბი 10-ჯერ გაიზარდა, – ამის შესახებ BM.GE-ს აგრო-სასურსათო პროდუქტის ონლაინ გაყიდვების ვებგვერდის ერთ-ერთმა დამფუძნებელმა ნათია ნინიკელაშვილმა განუცხადა.

ბიზნესის წარმოებაზე საუბრისას, ნათია ნინიკელაშვილი აღნიშნავს, რომ COVID-19-მა მათზე როგორც დადებითად, ასევე უარყოფითად იმოქმედა, თუმცა მათ სწრაფად შეძლეს არსებულ რეალობას მორგებოდნენ და იმ გამოწვევებისთვის ეპასუხათ, რაც მათ ვირუსმა შეუქმნათ. კომპანიის დამფუძნებელი მიიჩნევს რომ ეს მათთვის კარგი გამოცდილება იყო, რომელიც შემდგომში ბიზნესის წარმოებაში დაეხმარებათ.

„კორონავირუსის გავრცელებით შემქნილმა მდგომარეობამ ჩვენს კომპანიაზე ძალიან იმოქმედა. პირველ რიგში აღვნიშნავ იმას, რომ მას შემდეგ რაც ჩაიკეტა სატრანსპორტო გადაადგილება და ონლაინ მომსახურების განხორციელებასაც ყველა კომპანია ვერ ახერხებდა, ჩვენი გაყიდვები 10-ჯერ გაიზარდა. მეორე მხრივ – გადაადგილების შეზღუდვამ აგრო-სასურსათო პროდუქტის მოწოდება გაართულა. თუმცა გრძელვადიანმა ურთიერთობებმა მოგვცა საშუალება, რომ დაგველაგებინა ეს მდგომარეობა – ზოგს ფოსტით გამოეგზავნა პროდუქტი, ზოგს ჩვენ შევხვედროდით და ასე დავძლიეთ ეს გამოწვევა. ამ პერიოდში პროდუქტების ასორტიმენტიც შეგვიმცირდა, მაგრამ მოვახერხეთ და სხვა ფერმერები, რომლებიც მზად იყვნენ ეს პროდუქტები ჩაენაცვლებინათ, მათ ხარჯზე გავიტანეთ თავი.

ახლა, როდესაც მდგომარეობა ცოტა დამშვიდდა, შემიძლია ვთქვა რომ ჩვენ შევძელით გაზრდილ მოთხოვნაზე პასუხის გაცემა. ამასთან შევინარჩუნეთ ხარისხი. რა თქმა უნდა, შეუცდომელი არავინაა და ასეთ გარემოში შესაძლოა ტექნიკური ხასიათის შეცდომებიც დაგვეშვა, მაგრამ ამას ჩვენ ვუყურებთ როგორც გამოცდილებას და შევძელით საკუთარი რესურსების შეფასება. ამის შემდეგ თუ იმ ნიშნულზე არ გაჩერდა გაყიდვები, როგორც ახლაა ჩვენ შეგვიძლია ვიმუშავოთ რომ შევინარჩუნოთ ეს მასშტაბები“, – ამბობს ნათია ნინიკელაშვილი.

Soplidan.ge-ის დამფუძნებელი იმ ცვლილებებსა და დათმობებზეც საუბრობს, რომლის გაკეთებაც მოუწიათ ამ რთულ პერიოდში.

„პირველივე დღეებიდან, როდესაც ეს პროცესები დაიწყო, ჩვენ მიტანის სერვისი უფასო გავხადეთ. თუ მანამდე ქალაქის მასშტაბით 3 ლარი იყო და გარეუბნებში 8 ლარი, დღემდე მიტანას უფასოდ ვახორციელებთ.

ასევე შევცვალეთ ანგარიშსწორების ფორმაც და ყველა შესაძლო ვარიანტიდან მხოლოდ ონლაინ ანგარიშსწორება დავტოვეთ იმისთვის, რომ ჩვენი კურიერებისთვის და მომხმარებლისთვის უსაფრთხო გარემო შეგვექმნა. გაზრდილი მოთხოვნის პარალელურად, ჩვენი თანამშრომლების რაოდენობაც გაორმაგდა – ამ პერიოდში 9 თანამშრომელი დავასაქმეთ, რითიც დასაქმებულთა რაოდენობა 20-მდე გაიზარდა.

ამასთან გავამკაცრეთ უსაფრთხოების ნორმებიც, რაღა თქმა უნდა რეკომენდაციებისა და სტანდარტების შესაბამისად“, – უთხრა BM.GE-ის ონლაინ მაღაზიის დამფუძნებელმა.

კითხვაზე, რამდენად გაიზარდა კომპანიის ხარჯები და ხომ არ იქონია ამან გავლენა პროდუქტის ფასზე, ნათია ნინიკელაშვილი ამბობს, რომ ხარჯების გაზრდის მიუხედავად, მათ პარტნიორებთან თანამშრომლობით შეძლეს, რომ პროდუქტზე ფასები შეენარჩუნებინათ.

მისივე თქმით, თუ მანამდე აგრო-სასურსათო პროდუქტის ონლაინ მაღაზია 400-მდე ფერმერთან და მეწარმესთან თანამშრომლობდა, დღეს მათი რაოდენობა მიუხედავად შეზღუდვების გავლენისა, 500-მდე გაიზარდა.

წყარო:bm.ge

„საქსტატის“ მონაცემებით, აპრილში წინა წლის შესაბამის პერიოდთან შედარებით ხილი 45%-ით, რძის ნაწარმი 23%-ით, ხორცპროდუქტები 15%-ით, პურპროდუქტები კი 8.4%-ით გაძვირდა

0

სტატისტიკის ეროვნული სამსახურის მონაცემებით, 2020 წლის აპრილში წინა წლის შესაბამის პერიოდთან შედარებით ხილი 45%-ით, რძის ნაწარმი 23%-ით, ხორცპროდუქტები 15%-ით, პურპროდუქტები კი 8.4%-ით გაძვირდა.

„საქსტატმა“ აპრილის ინფლაციის მაჩვენებელი გამოაქვეყნა, რომლის მიხედვითაც აპრილში წლიური ინფლაციის დონემ 6.9 პროცენტი შეადგინა.

წლიური ინფლაციის ფორმირებაზე ძირითადი გავლენა იქონია ფასების ცვლილებამ სურსათი და უალკოჰოლო სასმელების ჯგუფში, სადაც ფასები გაიზარდა 16.1 პროცენტით. კერძოდ, ფასები მომატებულია შემდეგ ქვეჯგუფებზე: ხილი და ყურძენი (45.4 პროცენტი), რძე, ყველი და კვერცხი (23.2 პროცენტი), შაქარი, ჯემი და სხვა ტკბილეული (16.9 პროცენტი), ხორცი და ხორცის პროდუქტები (15 პროცენტი), თევზეული (14.9 პროცენტი), ბოსტნეული და ბაღჩეული (14.1 პროცენტი), ზეთი და ცხიმი (11.0 პროცენტი), მინერალური და წყაროს წყალი, უალკოჰოლო სასმელები და ნატურალური წვენები (10 პროცენტი), ყავა, ჩაი და კაკაო (10 პროცენტი) და პური და პურპროდუქტები (8.4 პროცენტი).

ამასთან, აპრილში ჯანმრთელობის დაცვის მიმართულებით ფასები გაიზარდა 4.9 პროცენტით. ფასების ზრდა დაფიქსირდა სამედიცინო პროდუქციის, აპარატურისა და მოწყობილობების (8.4 პროცენტი) და ამბულატორიულ სამედიცინო მომსახურების (4.4 პროცენტი) ქვეჯგუფებზე.

წყარო:ipn.ge

იმერეთში სტიქიის შედეგად მიყენებულ ზარალს ითვლიან

0

იმერეთში სახელმწიფო რწმუნებულის, ზვიად შალამბერიძის განცხადებით, სეტყვამ და წყალდიდობამ საჩხერის რამდენიმე სოფელი დააზარალა.

როგორც შალამბერიძემ „ინტერპრესნიუსს“ განუცხადა, სტიქიის შედეგად მიყენებულ ზარალს შესაბამისი კომისია ითვლის.

„ვითვლით ზარალს შესაბამისი კომისიის მეშვეობით. როცა გახდება ცნობილი, გავაჟღერებთ. სხვადასხვა სოფელში იყო სეტყვა და წყალდიდობა, ამიტომ ზარალი კომპლექსურად უნდა დავითვალოთ“,- განაცხადა შალამბერიძემ.

წყარო:ipn.ge

ბოლო ერთ წელიწადში ხილი 1,5-ჯერ გაძვირდა

0

საქართველოში ბოლო ერთი წლის განმავლობაში ხილი 1,5-ჯერ გაძვირდა. მონაცემებს საქსტატი აქვეყნებს.ეს იმას ნიშნავს, რომ ვაშლი, რომელიც გასულ წელს 3 ლარი ღირდა, წელს 4 ლარი და 35 თეთრი ღირს.

2019 წლის აპრილიდან 2020 წლის აპრილამდე სურსათსა და უალკოჰოლო სასმელებზე ფასები, საშუალოდ, 16 პროცენტით გაძვირდა. ფასები პროდუქტების მიხედვით ასე გაიზარდა:

ხილი და ყურძენი – 45,4%;
რძე, ყველი და კვერცხი – 23,2%;
შაქარი, ჯემი და სხვა ტკბილეული 16,9
ხორცი და ხორცის პროდუქტები – 15%;
თევზეული – 14,9%;
ბოსტნეული და ბაღჩეული – 14,1%;
ზეთი და ცხიმი – 11%;
მინერალური და წყაროს წყალი, უალკოჰოლო სასმელები და ნატურალური წვენები – 10%;
ყავა, ჩაი და კაკაო – 10%;
პური და პურპროდუქტები – 8,4%.
ბოლო ერთ თვეში სურსათსა და უალკოჰოლო სასმელებზე ფასები 3 პროცენტით გაიზარდა.

წყარო:commersant.ge

საქართველოს ფერმერთა ასოციაციის პასუხი კორონავირუსით გამოწვეულ კრიზისს

0

პაპაჩემი იტყოდა ხოლმე, ცხოვრებაში ერთხელ მაინც დაგჭირდება ექიმი, იურისტი, პოლიციელი და მღვდელი; მაგრამ ყოველ დღე, დღეში 3-ჯერ, შენ გჭირდება ფერმერი“- ბრენდა შოპი (2012), კანადელი ფერმერი, ავტორი, მენტორი და შთამაგონებელი სპიკერი.

ავტორები: თეკლა გურგენიძე, რატი კოჭლამაზაშვილი.

გლობალურმა გამოწვევამ – Covid-19-მა მთელი მსოფლიო მოიცვა და გააერთიანა მის წინააღმდეგ ბრძოლაში. როგორც განვითარებული, ისე  განვითარებადი ქვეყნები, საერთო პრობლემის წინაშე აღმოჩნდნენ, რამდენადაც ადამიანის  ყველაზე ფუნდამენტური -სიცოცხლის უფლება (ყველაზე ძირეული უფლება, ჯონ ლოკი) და ჯანმრთელობა საფრთხის ქვეშ დადგა.

კორონავირუსის პანდემიის წინააღმდეგ ბრძოლაში ჯანდაცვის სექტორის შემდეგ, სოფლის მეურნეობა ერთ-ერთი პრიორიტეტული დარგია არა მხოლოდ საქართველოში, არამედ მსოფლიოს  ბევრ ქვეყანაში. დღეს, ფერმერის როლი მთელი მსოფლიოს მასშტაბით კიდევ  უფრო გაიზარდა, რადგან ისინი იმ მნიშვნელოვანი დოვლათის შემქნელები არიან, რომელზეც დამოკიდებულია სასურსათო უსაფრთხოების საკითხი – ქვეყანაში მოსახლეობის გამოსაკვებად საკმარისი სურსათის არსებობა.

ცნობილი ამერიკელი ფილოსოფოსის აბრაჰამ ჰაროლდ მასლოუს ,,მოთხოვნილებათა იერარქიული პირამიდის’’ თეორიის თანახმად, ადამიანთა პიროვნული განვითარება ძირეულ მოთხოვნილებათა დაკმაყოფილებით იწყება. მასლოუს პირამიდა ხუთსაფეხურიანია, პირველ ორ საფეხურს ფილოსოფოსი პირველად, უმთავრეს მოთხოვნილებებს უწოდებს, ხოლო დანარჩენი მოთხოვნილებები შეძენელი სახისაა. იერარქიული პირამიდის პირველ საფეხურად მასლოუ ფიზიოლოგიურ მოთხოვნილებებს ასახელებს, როგორებიცაა: შიმშილი და წყურვილი (Maslow, 1943). ეს თეორია კიდევ ერთხელ ადასტურებს იმ ფაქტს, რომ როდესაც არსებობს საფრთხე და ამ საფრთხეს ახლა კორონავირუსი ჰქვია, იმისა რომ ადამიანი ვერ შეძლებს უპირველესი მოთხოვნილებები დაიკმაყოფილოს, სხვა  ყველაფერი ასეთ დროს მეორეხარისხოვანი ხდება. ამ ბრძოლაში ფერმერები ფრონტის წინა ხაზზე დგანან, სწორედ მათზეა დამოკიდებული ათასობით ადამიანის გამოკვებისა და, შესაბამისად, სიცოცხლის უზრუნველყოფა.

ფერმერებისა და სოფლის მეურნეობის დახმარების მიზნით მსოფლიოს მასშტაბით შეიქმნა არაერთი ახალი ინიციატივა, პორტალი, ვებგვერდი – ასეთი ტიპის პლატფორმებზე თავმოყრილი ინფორმაციით ფერმერებს შესაძლებლობა აქვთ ოპერატიულად მიიღონ საჭირო ინფორმაცია. როგორც წესი, კრიზისის მართვაში ოპერატიულ, სანდო ინფორმაციას ხშირად გადამწვეტი როლი ენიჭება. ამასთანავე, მნიშვნელოვანია, რომ  ფერმერებისათვის არსებული  ნებისმიერის სახის პრობლემა (გადაადგილების, პროდუქტის გასაღების და ა.შ.) დროულად აღმოიფხვრას.

სახელმწიფოს მთავრობებთან ერთად, ფერმერთა გაერთიანებებს (ასოციაციებს) ამ გამოწვევების გასამკლავებლად განსაკუთრებული როლი ენიჭება. ამ პროცესებს არც საქართველოს ფერმერთა ასოციაცია ჩამორჩა და მთელ რიგ ღონისძიებებს ატარებს კორონავირუსით გამოწვეული კრიზისის საპასუხოდ:

  • იმისათვის, რათა  ფერმერთა წინაშე არსებული ძირითადი გამოწვევები  დროულად შეფასებულოყო, საქართველოს ფერმერთა ასოციაციამ ჩაატარა კვლევა. ანალიზში ნაჩვენებია როგორც საქართველოს სასურსათო სექტორის მოწყვლადობა, ასევე ფერმერული მეურნეობების ძირითადი პრობლემები, რომლებიც კორონავირუსის ფონზე კიდევ უფრო გართულდა. ასევე, კვლევა იძლევა კონკრეტულ რეკომენდაციებს, თუ რა უნდა გააკეთოს სახელმწიფომ როგორც კრიზისის პერიოდში, ასევე პოსტ-კრიზისულ პერიოდში, რათა ქვეყანაში სოფლის მეურნეობა განვითარდეს და გაიზარდოს სასურსათო უსაფრთხოება.  შედეგად საქართველოს მთავრობის ანტიკრიზისულ გეგმაში სოფლისა და სოფლის მეურნეობის მხარდაჭერის კუთხით GFA-ს რამდენიმე ძირითადი რეკომენდაცია იქნა გათვალისწინებული.
  • საქართველოს ფერმერთა ასოციაციამ გამოაქვეყნა ხშირად დასმული კითხვები (FAQ), რომელიც იმ ძირითად კითხვებს პასუხობდა, რომლებიც ფერმერებს ყველაზე მეტად აინტერესებთ.
  • როგორც ქოლგა ასოციაცია, რომელიც აერთიანებს სოფლის მეურნეობის ბევრ სექტორულ ასოციაციას, საქართველოს ფერმერთა ასოციაცია გამოვიდა ინიციატივით  და პარტნიორ ასოციაციებთან ერთად შეიმუშავა საქართველოს მთავრობისადმი მიმართვა ფერმერებისთვის გადაადგილების შეზღუდვების შერბილებასთან ან სულაც მოხსნასთან დაკავშირებით. შედეგად, საქართველოს მთავრობის გადაწყვეტილებით, გადაადგილების შეზღუდვები შერბილდა, ხოლო ადგილობრივი თვითმართველობების წარმომადგენლები ფერმერთათვის  საშვებს სწრაფი ტემპით გაცემენ, რათა მათ საქმიანობაში ხელი არ შეეშალოთ. ასევე, საქართველოს ფერმერთა ასოციაცია, ბიზნესომბუდსმენის დახმარებით, ბევრ ფერმერს დაეხმარა, რათა გადაადგილების საშვი მათზე დროულად გაცემულიყო.
  • რადგან მიმდინარე კრიზისის ფონზე პროდუქციის რეალიზაცია ერთ-ერთ ყველაზე მწვავე პრობლემად გამოიკვეთა, საქართველოს ფერმერთა ასოციაციამ ერთი  მხრივ, დაიწყო მოლაპარაკებები სადისტრიბუციო კომპანიებთან და სარეალიზაციო ქსელებთან, მეორე მხრივ, კი სპეციალური ონლაინ-კითხვარის საშუალებით აგროვებს მონაცემებს ყველა იმ ფერმერზე, რომლებსაც  გასაღების პრობლემა აქვთ (იხილეთ კითხვარის ბმული). ეს პროცესი უწყვეტ რეჟიმში მიმდინარეობს და დღეის მდგომარეობით, უკვე იდენტიფიცირებულია 100-მდე ფერმერი, რომელთა შესახებ მონაცემები გადაცემულია იმ სადისტრიბუციო კომპანიებისა და სარეალიზაციო ქსელებისთვის, რომლებიც მზად არიან  შეიძინონ ფერმერების პროდუქცია.
  • საქართველოს ფერმერთა ასოციაცია ატარებს და მონაწილეობს სხვადასხვა ვებინარებში, რათა ფერმერებს დისტანციურად მიაწოდოს მნიშვნელოვანი და საჭირო ინფორმაცია.
  • საქართველოს ფერმერთა ასოციაციის თავმჯდომარემ, ნინო ზამბახიძემ, თავის მეგობრებთან ერთად ჯერ კიდევ 16 მარტს, საგანგებო მდგომარეობის გამოცხადებამდე, ჩამოაყალიბა დახმარების პლატფორმა „ერთიანობა“, რომლის მიზანიც გახლავთ ყველაზე უფრო მოწყვლადი და გაჭირვებული ადამიანების დახმარება – უმეტესად, მათი უფასოდ მომარაგება სურსათით, მედიკამენტებითა და სხვა აუცილებელი საყოფაცხოვრებო ნივთებით. საქართველოს ფერმერთა ასოციაციის გუნდი, ისევე როგორც მისი პარტნიორი ონლაინ-მაღაზია soplidan.ge აქტიურად მონაწილეობენ აღნიშნული დახმარების კამპანიაში და ქართველი ფერმერების მიერ წარმოებულ პროდუქციით ამარაგებენ ყველაზე უფრო მოწყვლად ჯგუფებს. შედეგად, 4 მაისის მდგომარეობით, მთელი ქვეყნის მასშტაბით მობილიზებულია 1200 მოხალისე და დახმარება უკვე გაეწია 2780 ადამიანს;

ამასთანავე, საქართველოს ფერმერთა ასოციაცია აქვეყნებს ბლოგებს კორონავირუსის პანდემიით გამოწვეულ კრიზისზე, რათა კიდევ უფრო მეტი ინფორმაცია მიაწოდოს ფერმერებსა  და საქართველოს სოფლის მეურნეობით დაინტერესებულ ყველა მხარეს. ყველა ეს ქმედება ემსახურება ფერმერთა დახმარებასა და ქვეყნის მთლიანი მოსახლეობის სურსათით უწყვეტი უზრუნველყოფის მხარდაჭერას.

რომელ მიმართულებებზე გაკეთდება აქცენტი პოსტკრიზისულ გეგმაში – ეკონომიკის მინისტრი

0

ეკონომიკის მინისტრმა ნათია თურნავამ დღეს ტექნოპარკში ანტიკრიზისული გეგმის პრეზენტაცია გამართა. მისი თქმით, მთავრობა მუშაობს პოსტკრიზისულ გეგმაზეც, რომლის ფარგლებშიც სახელმწიფო აქცენტს გააკეთებს “ეკონომიკის ამოქოქვაზე” გააკეთებს. 

ეკონომიკის მინისტრის თქმით, მიუხედავად იმისა, რომ პოსტკრიზისული გეგმა არ არის დასრულებული, გამოყოფილია მიმართულებები, რომელთა მხარდაჭერას სახელმწიფო ეპიდემიის შემდგომ პერიოდში განახორციელებს და ეს სულ მალე მოხდება.

„ჩვენ გავახმოვანეთ რა ანტიკრიზისული გეგმა, იმავე დღეს, პრემიერ-მინისტრის დავალებით დავიწყეთ მუშაობა პოსტკრიზისულ გეგმაზე.  პოსტკრიზისული გეგმა, რომელიც ძალიან მალე ამოქმედდება, არის მომავალში ეკონომიკის ამოქოქვის გეგმა. დეტალები ჯერ არ არის ბოლომდე დასრულებული, ექსპერტები და ჩვენი ეკონომიკური გუნდი ამაზე მუშაობს, მაგრამ მიმართულებებს მიგანიშნებთ –  პირველი და მნიშვნელოვანი მიმართულება ჩვენი პოსტკრიზისული გეგმის, იქნება ადგილობრივი წარმოების განვითარება; ახლა განსაკუთრებით ვხედავთ, რამდენად მნიშვნელოვანია შენ საკუთარი რესურსი გქონდეს განვითარებული და საკუთარი საქონლით მაქსიმალურად უზრუნველყო საკუთარი ბაზარი. ჩვენ გვაქვს ამის პოტენციალი სოფლის მეურნეობასა და გადამამუშავებელ ინდუსტრიებში, როგორიც არის თევზჭერა და ქართული თევზის წარმოება; ბოსტნეულის წარმოება; რძე და რძის პროდუქტების წარმოება; ხორცი, ხორცის კონსერვები; მარცვლეული; ქართული ზეთი და ბევრი სხვა მიმართულება;  იმპორტის  ადგილობრივი წარმოებით ჩანაცვლების ასეთივე პოტენციალი ჩვენ გვაქვს სამშენებლო მასალების წარმოებაში, იქნება ეს ქართული კერამიკა, ქართული არმატურა თუ მოსაპირკეთებელი მასალები.  შემდგომი ჩვენი პრეზენტაციის და გეგმის ნაწილი იქნება სწორედ ის, როგორ უდგას ჩვენი მთავრობა – პოლიტიკური გუნდი ქართულ წარმოებას გვერდში. ქართული წარმოება იქნება სამომავლოდ მთავარი პრიორიტეტი და ამის პირველ მაგალითებს თქვენ უკვე ხედავთ. მაგალითად, იგივე “აგარის შაქრის კომბინატი”, რომელიც გაიხსნა გასული საუკუნის 30-იან წლებში და ახლა კვლავ გაიხსნა და 500 ოჯახს დაასაქმებს და ადგილობრივ ბაზარს ადგილობრივი შაქრით სულ მცირე 45%-ით მოვამარაგებთ.

მეორე მიმართულება პოსტკრიზისული გეგმის, რაზეც ვმუშაობთ, იქნება ჩვენი ახალი როლი წარმოების გლობალური ბიზნესის გადანაწილებაში.  ამ პანდემიის პერიოდში სულ მცირე 40% მულტინაციონალური კომპანიების, დარწმუნდა, რომ საკმაოდ სარისკოა იქონიო ერთ კონკრეტულ გეოგრაფიულ ჰაბში თავმოყრილი შენი წარმოება; აქედან გამომდინარე, ახლა წავა ტენდენცია ამ ჰაბებიდან, ჩინეთიდან და სხვა ჰაბებიდან ბიზნესების რეალოკაციის ალტერნატიულ პლატფორმებზე და ჩვენ საქართველო, იმიტომ რომ ყველაზე მალე დავძლევთ კორონავირუსს, იმიტომ რომ კრიზისამდეც ვიყავით ყველაზე მიმზიდველი საინვესტიციო გარემოთი, იმიტომ რომ გვაქვს გამართული დახმარების პროგრამები, ჩვენ ვიქნებით ერთ-ერთი ნომერ პირველი არჩევანი ასეთი კომპანიებისთვის. ჩვენ ვმუშაობთ ამაზე და კონკრეტულ პროგრამებს შევთავაზებთ ისეთ დარგებს, როგორიც არის ელექტრონაწარმი – ინდუსტრიული და საყოფაცხოვრებო; ფარმაცევტული პროდუქცია და სამედიცინო კვლევები; საფეიქრო და სამკერვალო წარმოება; ლოგისტიკა; პროფესიული ბიზნესის სერვისები და სხვა”, – განაცხადა ეკონომიკის მინისტრმა.

წყარო:bm.ge