Home Blog

საქართველოს ხორბლის 2 თვეზე მეტის მარაგი აქვს – როგორ აისახება ქართულ ბაზარზე რუსული ხორბლის გაძვირება

0

ხორბლის მარაგები გვაქვს, დაახლოებით, 2 თვეზე მეტი სამყოფი. რაც შეეხება რუსეთში ფასების ზრდას, ჩვენ ვფიქრობთ, რომ აქ 2 კომპონენტია, რომელიც ვითარებას დაარეგულირებს – ამის შესახებ ხორბლისა და ფქვილის მწარმოებელთა ასოციაციის აღმასრულებელმა დირექტორმა ლევან სილაგავამ „ბიზნესპრესნიუსთან“ საუბრისას განაცხადა.

აღნიშნულით ის, რუსულ ხორბალზე ფასის რეკორდულ ზრდას გამოეხმაურა. კერძოდ, ადგილობრივი მედიის ინფორმაციით, თუ აქამდე რუსულ ბაზარზე ერთი ტონა ხორბალი 155 დოლარი ღირდა, ახლა 170, 5 დოლარამდე გაძვირდა.

რუსული ხორბლის ფასის მკვეთრი მატების მიზეზად პროდუქტზე გლობალური მოთხოვნის ზრდა და რუბლის შესუსტება სახელდება. მსოფლიო ბაზრებზე მარცვლეულის მოთხოვნა ბოლო რამდენიმე კვირის განმავლობაში 6-7%-ით გაიზარდა.

რუსეთი ხორბლის ერთ-ერთი უმსხვილესი ექსპორტიორია. შესაბამისად, საქართველოშიც ხორბლის ძირითადი ნაწილი სწორედ რუსეთიდან შემოდის. „ბიზნესპრესნიუსი“ დაინტერესდა, რა მოცულობის ხორბლის მარაგები აქვს საქართველოს და რა მოხდება მისი ამოწურვის შემდეგ. კერძოდ, როგორ აისახება რუსული ხორბლის გაძვირდება ადგილობრივ ბაზარზე, მოიმატებს თუ არა პურ-პროდუქტების ფასი?

ლევან სილაგავა: „მარაგები გვაქვს დაახლოებით, 2 თვეზე მეტი სამყოფი. რაც შეეხება რუსეთის ბაზარზე ფასების ზრდას. გეთანხმებით, გაძვირდა, თუმცა ჩვენ ვფიქრობთ, რომ აქ ორი კომპონენტია, რომელიც ვითარებას დაარეგულირებს. ერთი – ფასი გაიზარდა, ამის ერთ-ერთი მიზეზია აჟიოტაჟი კორონავირუსის გამო, თუმცა ივნისში რუსეთში მოსავლის პერიოდი იწყება. შესაბამისად, ცოტახანში ეს აჟიოტაჟი ჩაცხრება, რასაც მოსალოდნელი საკმაოდ კარგი მოსავლის პერიოდი დაემატება და ვფიქრობთ, რომ სიტუაცია დასტაბილურდება.

რაც შეეხება მეორე ფაქტორს, თქვენ იცით, რომ საქართველოს მთავრობას 9 პროდუქტზე მიღებული აქვს სავალუტო გადაზღვევის მექანიზმი. როდესაც 1 დოლარის ღირებულების პროდუქტი, 3 ლარის ღირებულებად შესაძლებელია, რომ შევიძინოთ. შესაბამისად, ეს გარკვეული დაზღვევა იქნება იმისა, რომ ამ კალათაში შემადგენელ პროდუქტებზე: ხორბალზე, ბრინჯზე, წიწიბურაზე, რძის პროდუქტებზე და აშ. ფასები დაბალანსდეს“,-აცხადებს ლევან სილაგავა.

წყარო:bpn.ge

1ანობა

0

მთელი მსოფლიო და, მათ შორის, საქართველოც COVID 19 ვირუსის გავრცელების წინააღმდეგ ყოველდღიურად იბრძვის. როგორც სახელმწიფო, ასევე კერძო სექტორი აქტიურად არის ჩართული სხვადასხვა პროცესებში. ამიტომ, მეგობრებმა გადავწყვიტეთ შეგვექმნა პლატფორმა, რომელიც გულანთებულ, მოტივირებულ ადამიანებს გაგვაერთიანებს, ჩვენს ქვეყანაში არსებული გამოწვევების დაძლევის მიზნით.გამარჯვება ერთიანობაშია და ეს ჩვენ ყველაზე კარგად გამოგვდის.

1ანობის გვერდზე გადასასვლელად დააჭირეთ აქ

რაციოლი

0

მერძეული ფურის საკვები ულუფის (რაციონის) გამომთვლელი ქართულ ენაზე შედგენილი პროგრამა „რაც-იოლი 1.0’’ კარგი საშუალებაა დამწყები და საშუალო ზომის ფერმერებისთვის და მარტივად გამოსაყენებელია:

  • ფურის პარამეტრების მიხედვით ადგენს მის დღიურ საკვებ ნორმას.
  • საკვები ინგრედიენტების შერჩევისით პროგრამა ითვლის საკვები ულუფის ჯამურ კვებით ღირებულებას, შესაბამისად საშუალებას იძლევა  შედგეს დაბალანსებული ულუფა.
  • საკვები ინგრედიენტების ფასების შეყვანის შემთხვევაში პროგრამა ადგენს საკვები ულუფის ჯამურ ფასს და შესაბამისად თითოეული ცხოველის კვებისთვის გაწეულ ხარჯებს.
  • რეალიზებული რძის ფასის შეყვანის შემთხვევაში პროგრამა ასევე ითვლის რძის შემოსავლის და კვების ხარჯის ნაშთს.
  • ოპტიმიზაციის ფუნქცია დამატებით საშუალებას იძლევა განსაზღვროს ფურის კვების ყველაზე დაბალი ხარჯები.

პროგრამა „რაც-იოლი 1.0“ შეიქმნა პროექტის “ინვესტირება უვნებელ და ხარისხიან მესაქონლეობაში“ (SQIL) ფარგლებში, რომელიც დაფინანსებულია აშშ-ის სოფლის მეურნეობის სამინისტროს (USDA) მიერ და ახორციელებს Land O’Lakes Venture37-ი, საქართველოს ფერმერთა ასოციაციასთან (GFA) და მიჩგანის სახელმწიფო უნივერსიტეტთან (Michigan State University) პარტნიორობით.

მერძეული ფურის საკვები ულუფის (რაციონის) გამომთვლელი პროგრამა (რაც-იოლი 1.0)

მერძეული ფურის საკვები ულუფის (რაციონის) გამომთვლელი პროგრამის სახელმძღვანელო


რა რეგულაცია ეკისრებათ ფრინველის ხორცის მწარმოებლებს

0

“ზოგიერთი ქვეყნიდან იმპორტირებულ ქათმის გაყინულ ხორცში წყლის შემცველობა 40%-მდეც აღწევდა. ეს იყო მოსახლეობის მოტყუება – გამოდის, მომხმარებელი ორმაგ ფასს იხდიდა, რადგან ეტიკეტზე არ იყო ინფორმაცია, რომ ნახევარ ღირებულებას წყალში იხდიდა”

საქართველოში 1-ლი თებერვლიდან ფრინველის ხორცის ტექნიკური რეგლამენტი ამოქმედდა, რაც ნიშნავს, რომ გაყინულ და სწრაფად გაყინულ ქათმის ხორცში წყლის შემცველობა 5%-ს არ უნდა აღემატებოდეს.

გარემოს დაცვისა და სოფლის მეურნეობის სამინისტროში ფიქრობენ, რომ ახალი რეგლამენტი მომხმარებელთა უფლებებს დაიცავს, მწარმოებლები და იმპორტიორები კი ვარაუდობენ, რომ ეს პროდუქციას კილოგრამზე საშუალოდ 15-20%-ით გააძვირებს.

მაია ბერუაშვილი, გარემოს დაცვისა და სოფლის მეურნეობის სამინისტროს სურსათის უვნებლობის სამმართველოს უფროსი: “ეს დადგენილება 2019 წლის ივლისში მივიღეთ და მწარმოებლებსა თუ იმპორტიორებს საკმარისი დრო ჰქონდათ, რათა რეგულაციებს მომზადებული შეხვედროდნენ. აქვე გეტყვით, რომ თუ ქათმის ხორცი ბაზარზე 2020 წლის 1-ლ თებერვლამდე განთავსდა, მას წყლის შემცველობასთან დაკავშირებული შეზღუდვები არ შეეხება ვარგისიანობის ვადის ამოწურვამდე.

აქამდე ქათმის ხორცში წყლის შემცველობასთან დაკავშირებული შეზღუდვები არ მოქმედებდა და მომხმარებელი დაუცველი­ იყო. მას არ ჰქონდა ინფორმაცია, რამდენ წყალს შეიცავდა შეძენილი პროდუქტი. ამჯერად შემუშავდა ფრინველის ხორცის ტექნიკური რეგლამენტი, რაც მარკეტინგული სტანდარტია და აწესებს მოთხოვნას, რომ გაყინულ და სწრაფად გაყინულ ფრინველის ტანხორცსა და ახალ, გაყინულ და სწრაფად გაყინულ ფრინველის ნაჭრებში წყლის საერთო შემცველობა, გამოყენებული გაცივების მეთოდის მიუხედავად, 5%-ს არ უნდა აღემატებოდეს.

სხვათა შორის, ეს სტანდარტი მწარმოებლების მომართვის საფუძველზე მივიღეთ. მათ მიაჩნდათ, რომ ქათმის ხორცში წყლის შემცველობის ნორმირება ხელს შეუწყობდა ადგილობრივ წარმოებას, თან გათვალისწინებული იქნებოდა მოსახლეობის ეკონომიკური ინტერესიც. სამინისტრომ გადაწყვიტა შეხვედროდა როგორც მწარმოებლებს, ისე იმპორტიორებს და სწორედ მათთან შეთანხმებით მივიღეთ ეს დადგენილება. რაც შეეხება მონიტორინგს, ქათმის ხორცი შემოწმდება საბაჟო პროცედურების დროს და სხვა დოკუმენტაციასთან ერთად პროდუქციის შემომტანს თან უნდა ჰქონდეს ვეტერინარული სერტიფიკატი, სადაც ქათმის ხორცში წყლის შემცველობა იქნება მითითებული. გარდა ამისა, საბაჟოზე შესაძლოა შერჩევით აიღონ პროდუქციის ნიმუშები და შეამოწმონ, შეესაბამება თუ არა დოკუმენტში მითითებული მონაცემები კანონმდებლობით მოთხოვნილ ნორმებს. თუ შემოტანილი პროდუქცია ვერ დააკმაყოფილებს ტექნიკური რეგლამენტის პარამეტრებს, პარტია მწარმოებელ ქვეყანაში გაბრუნდება.

შემოწმებას შემოსავლების სამსახური ჩაატარებს, სურსათის უვნებლობის სააგენტო­ კი ვალდებულია, ბაზარზე გააკონტროლოს ფრინველის ხორცში წყლის შემც­ველობა შესყიდული ნიმუშების მიხედვით.­ თუ აღმოაჩენს, რომ ქათმის ხორცში წყლის შემცველობა 5%-ს აღემატება, პირველ შემთხვევაზე პროდუქციას წითელი ეტიკეტი დაეკვრება, სადაც იქნება წარწერა, რომ წყლის შემცველობა კონკრეტულ პროდუქტში დაშვებულ ზღვარს აღემატება. ეს იქნება გაფრთხილება მომხმარებლისთვის და უკვე ის გადაწყვეტს, იყიდის თუ არა. მაგრამ, თუ მწარმოებელი­ ან იმპორტიორი განაგრძობს რეგულაციის დარღვევას, შემდგომ ჯერზე სააგენტოს შეუძლია უფრო მკაცრ სანქციებს მიმართოს და კანონდამრღვევი ეკონომიკური სუბიექტის პროდუქცია ბაზარზე აღარ დაუშვას.

ბევრს აინტერესებს, გამოიწვევს თუ არა ეს რეგულაცია ფასის ცვლილებას. როცა იმპორტიორები და მწარმოებლები ამბობენ, რომ ქათმის ხორცი შესაძლოა 15-20%-ით გაძვირდეს, ფაქტობრივად, აღიარებენ, რომ მათი პროდუქცია სწორედ ამ ოდენობით წყალს შეიცავდა. წყლის გარეშე პროდუქტის ღირებულება იგივე დარჩება და შესაბამისად, გაძვირების საფუძველს ვერ ვხედავთ. აქვე მინდა საექსპორტო პროდუქციასთან დაკავშირებული ერთი დეტალი დავაზუსტო – თუ ის ბაზარი, სადაც საქართველოში­ წარმოებული ქათმის ხორცი გადის, არ აწესებს შეზღუდვებს წყლის შემცველობაზე, მწარმოებლებს არ მოეთხოვებათ შესაბამისობა ახალი ტექნიკური რეგლამენტის მოთხოვნებთან.

მიმდინარე წლის 1-ლი თებერვლიდან ტექნიკური რეგლამენტით გათვალისწინებული მოთხოვნების მხოლოდ ნაწილი შევიდა ძალაში, დანარჩენის ამოქმედება კი მომდევნო წლებში იგეგმება. მაგალითად, 2024 წლიდან შემოვა ვალდებულება, რომ ფრინველის ხორცი დაიყოს კატეგორიებად და სავალდებულო იქნება პროდუქციის ეტიკეტზე შესაბამისი კატეგორიის მითითება. ადგილობრივ ბაზარზე დაშვებული იქნება მხოლოდ ორი – A და B კატეგორიების ფრინველის ხორცის რეალიზაცია. გარდა ამისა, მოხდება პროდუქციის წონის რეგულირება, რაც ნიშნავს, რომ სხვაობა ეტიკეტზე მითითებულ და შეფუთვაში მოთავსებულ შიგთავსის წონას შორის 25 გრამს არ უნდა აღემატებოდეს. \2025 წლიდან ფრინველის ხორცის ეტიკეტზე გაჩნდება წარწერა, რითაც მომხმარებელი შეიტყობს, როგორი ტიპის მეურნეობაში გამოზარდეს ფრინველი, საფრინველეში, ბუნებრივ პირობებში თუ ინდუსტრიულ ფერმერულ მეურნეობაში”.

რუსუდან გიგაშვილი, “მომავლის ფერმერის” თავმჯდომარე: “ეს კარგი გადაწყვეტილებაა, რადგან ზოგიერთი ქვეყნიდან იმპორტირებულ ქათმის გაყინულ ხორცში წყლის შემცველობა 40%-მდეც აღწევდა. ეს იყო მოსახლეობის მოტყუება – გამოდის, მომხმარებელი ორმაგ ფასს იხდიდა, რადგან ეტიკეტზე არ იყო ინფორმაცია, რომ ნახევარ ღირებულებას წყალში იხდიდა. შემიძლია თამამად გითხრათ, რომ დღეს იმპორტირებულ ქათამში ვერც ნახავთ წყლის ისეთ დაბალ შემცველობას, როგორიც რეგულაციით არის მოთხოვნილი. მომხმარებლის ჯიბის დაზოგვის გარდა, ეს წაახალისებს მწარმოებლებს და ნედლი ხორცის მოხმარებას გაზრდის. არა მგონია, ამ რეგულაციამ კეთილსინდისიერი იმპორტიორები დააზარალოს, თუმცა დაახლოებით 15-20%-ით ფასის ზრდას, ალბათ, გამოიწვევს როგორც იმპორტირებულ, ისე ადგილობრივ პროდუქციაზე. ადგილობრივი მწარმოებლები იძულებული იყვნენ, კონკურენციაში შესულიყვნენ დემპინგურ ფასად შემოსულ იაფ იმპორტირებულ პროდუქციასთან და შესაბამისად, მათაც უწევდათ მიემართათ მარკეტინგული ხრიკებისთვის.

დღეს საქართველოში რამდენიმე ათასი ფერმერია, მათ შორის არიან მეფრინველეობის მსხვილი და წვრილი მეურნეობები, მაგრამ ადგილობრივი წარმოება ვერ ასცდა წელიწადში 30-32 ათას ტონას, რაც საერთო მოხმარების დაახლოებით 30%-ია.

არადა, ჯანსაღი კონკურენციითა და სახელმწიფოს ხელშეწყობით ჩვენ შეგვიძლია ქვეყნის მომარაგება ქათმის ხორცით, დღეს კი რამდენიმე ათეული მილიონი დოლარი გადის ქვეყნიდან ქათმის გაყინული ხორცის შესაძენად. ეტაპობრივად, 5-7 წელიწადში ჩვენ შეგვიძლია იმპორტი სრულად ჩავანაცვლოთ ადგილობრივი წარმოებით, მაგრამ ამისთვის საჭიროა სისტემური ხედვა და მიდგომა. დარგი ძალიან დიდი ხანია ითხოვს დამატებული ღირებულების გადასახადისგან გათავისუფლებას. ეს არის ერთადერთი დარგი სოფლის მეურნეობაში, რომელიც დღგ-თი იბეგრება. არადა, თუ გადასახადისგან გათავისუფლდება, პროდუქციაც გაიაფდება და დარგიც განვითარდება. მეფრინველეები ითხოვენ, რომ ხუთწლიანი მორატორიუმი გამოცხადდეს, ხელისუფლებამ მისცეს მათ დრო, იაფ იმპორტს კონკურენცია გაუწიონ. ეს ჯაჭვურ რეაქციას გამოიწვევს, ამით მოგებული დარჩება, მაგალითად, მემარცვლეობაც. ვთქვათ, თქვენ გაქვთ მეფრინველეობის საწარმო და საკვებად მარცვლეულის შეძე­ნა გჭირდებათ. მას ქართველი ფერმერი­ს­გან არ იყიდით, რადგან მასთან დღგ-ს­ ვერ ჩაითვლით და უპირატესობას იმპორტირებულს მიანიჭებთ.

ადგილობრივი მეფრინველეობა სრულიად დაუცველია. თურქეთიდან ხშირად­ დემპინგურ ფასად შემოდის პროდუქცია. მაგალითად, 1 დღის წიწილის წარმოება, რაც მნიშვნელოვანი პროდუქტია ქათმის ხორცის საწარმოო ჯაჭვის დაწყებისთვის, საქართველოში ხდებოდა, ახლა კი გაიზარდა მისი იმპორტი თურქეთიდან დემპინგურ ფასად და ადგილობრივი წარმოება შეავიწროვა. სამწუხაროდ, ჩვენი მეწარმეებისთვის, რომლებსაც შეზღუდული ფინანსური რესურსები აქვთ, ფასი ყოველთვის წარმმართველია და ეს მიუხედავად იმისა, რომ ყოველი 10 თურქული წიწილიდან 2 წუნდებული აღმოჩნდა. ჩვენ არც ანტიდემპინგური კანონი გვაქვს, ის სადღაც სამთავრობო ლაბირინთშია გაჭედილი, და არც ადგილობრივი ბაზრის დაცვის სხვა მექანიზმები, რაც, სხვათა შორის, ბევრმა პოსტსაბჭოთა ქვეყანამ აამოქმედა და დღეს არა მარტო თვითკმარ პროდუქციას აწარმოებენ, არამედ ფრინველის ხორცი ევროკავშირის ბაზარზეც გააქვთ.

ქათმის ხორცში წყლის შემცველობის შეზღუდვა ერთი პატარა დეტალია, რომელიც ადგილობრივ წარმოებას წაახალისებს, მაგრამ დარგში კიდევ ბევრი პრობლემაა. მაგალითად, არიან არაკეთილსინდისიერი მეწარმეები, რომლებიც იატაკქვეშეთში მოქმედებენ.გვაქვს შემთხვევები, როცა ხორცის ხარისხის დამადასტურებელ ფორმა #2-ს აყალბებენ. სასაკლაოზე იხდიან პირობითად 50 ქათმის შემოწმების ღირებულებას და რეალურად აკვლევინებენ ათ-ოცჯერ მეტ ფრთა ფრინველს.

ფრინველის ხორცის წლიური მოხმარება საქართველოში ერთ სულ მოსახლეზე 13 კილოგრამს შეადგენს. ეს ერთ-ერთი ყველაზე მოთხოვნადი პროდუქტია მისი დადებითი, სასარგებლო თვისებებიდან და ხელმისაწვდომობიდან გამომდინარე, ამიტომ ხელისუფლებამ სათანადო ყურადღება უნდა გამოიჩინოს, რათა დარგის განვითარების პოტენციალი მაქსიმალურად იქნეს გამოყენებული, რაც ეკონომიკასაც წაადგება და ხალხსაც”.

წყარო:Bpn.ge

„მომხმარებელი უფრო მეტ ხორცს წაიღებს სახლში, ვიდრე მანამდე“ – გააძვირებს თუ არა ფრინველის ხორცს ახალი რეგლამენტი

0

როგორც გაყიდული ქათმის ხორცის იმპორტიორ კომპანიაში აცხადებენ, ამის მიზეზი შეიძლება ის ახალი რეგლამენტი გახდეს, რომელიც მთავრობამ სულ ახალხანს დაამტკიცა და რომლის მიხედვითაც პროდუქტში წყლის შემცველობა 5%-ს არ უნდა აღემატებოდეს.

როგორც ცნობილია, საქართველოს მთავრობამ მომხმარებელთა უფლებების დაცვის მიზნით „ტექნიკური რეგლამენტი – ფრინველის ხორცის მარკეტინგული მოთხოვნების დამტკიცების შესახებ“ მიიღო. აღნიშნული ცვლილების თანახმად, 2025 წლამდე გაყინული და სწრაფად გაყინული ქათმის მარკეტინგი დასაშვებია, თუ პროდუქტში წყლის შემცველობა არ აღემატება 5%-ს. ხოლო, 2025 წლის შემდეგ, ტექნიკური რეგლამენტი ადგენს, გაციების მეთოდიდან გამომდინარე, წყლის შემცველობის დასაშვებ სხვადასხვა ნორმას.

რეგლამენტით განსაზღვრულია დაფასოებული ადგილობრივი წარმოების გაყინული ან სწრაფად გაყინული ფრინველის ხორცის წონის კატეგორიის მიხედვით კლასიფიცირებაც. რეგლამენტის თანახმად, ყველა დაფასოებულ პროდუქტს უნდა ჰქონდეს წონის მაჩვენებელი.

ამასთან, ეტიკეტზე მეურნეობის ტიპის და ფრინველის ზრდის/გამოყვანის მეთოდების მითითება დასაშვები იქნება მხოლოდ ტექნიკური რეგლამენტის შესაბამისად. იმპორტირებული ხორცის შემთხვევაში, მას უნდა ახლდეს წარმოშობის ქვეყნის კომპეტენტური ორგანოს მიერ გაცემული სერტიფიკატი ან აკრედიტებული ლაბორატორიის მიერ გაცემული ოქმი, რომელიც ადასტურებს, რომ პროდუქტი შეესაბამება ტექნიკური რეგლამენტის მოთხოვნებს.

„ბიზნესპრესნიუსი“ დაინტერესდა, რას გამოიწვევს ბაზარზე ახალი რეგლამენტი, რაზეც ფრინველის ხორცის იმპორტიორების ნაწილი ამბობს, რომ პროდუქტი 15-20%-ით გაძვირდება. თუმცა, სპეციალისტები აცხადებენ, რომ ნებისმიერ შემთხვევაში, მოგებული მოხმარებელი დარჩება, რადგან ეცოდინება, რომ გადახდილი ფულით სუფთა წონის ხორცს შეიძენს და არა წყალს.

„გეო ფუდის“ დირექტრის მოადგილე გიორგი ჯოხაძე (იმპორტიორი)- „ზოგადად, გაყინული ქათმის ხორცის შემთხვევაში, აუცილებელია წყლის შემცველობა, თუმცა, რა თქმა უნდა, ნორმის ფარგლებში. ჩვენი პროდუქცია ამ მოთხოვნას სრულად აკმაყოფილებს და წყლის შემცველობა ნამდვილად არ აჭარბებს 5%-იან ზღვარს. თუმცა, უკრაინიდან, ასევე, თურქეთიდან იმპორტირებული გაყინული ფრინველის ხორცის შემთხვევაში, წყლის შემცველობა ხშირად არის 5%-ზე მეტი, რაც თავისთავად პრობლემა იქნება. ახალი რეგლამენტი კი სავარაუდოდ, პროდუქციის გაძვირებას გამოწვევს. ალბათ, 15-20%-ით“.

პროდუქციის გაძვირების პროგნოზს არ იზიარებს მეფრინველეობის განვითრების ასოციაციის თავმჯდომარე ზურაბ უჩუმბეგაშვილი. მისი თქმით, რეგლამენტის შემუშავება, მწარმოებლებთან და იმპორტიორებთან ერთად მოხდა. შესაბამისად, გათვალისწინებულია როგორც მათი, ისე მომხმარებლების ინტერესი.

„რეგულაცია, რომელიც გაყინული ფრინველის ხორცში წყლის შემცველობას განსაზღვრავს, როგორც ადგილობრივ მწარმოებლებთან, ისე მპორტიორებთან და სოფლის მეურნეობის სამინისტროს შესაბამის უწყებებთან ერთად შემუშავდა. რამდენიმე თვის განმავლობაში ყველასთან მიმდინარეობდა კონსულტაციები, რათა არავინ დაზარალებულიყო, არც მომხმარებელი და არც მწარმოებელ/იმპორტიორი. ეს არის ის რეგულაცა, რომელიც თითქმის, ყველა ქვეყანაში მოქმედებს და თავისთავად, ძალიან კარგია, რადგან ხშირად ხდებოდა მომხმარებლის მოტყუება, ამასთან, ზარალდებოდა პატიოსანი მწარმოებელი და იმპორტიორიც.

რეგულაციის შედეგად, ბაზარზე პროდუქციის ფასის მომატებას გამოვრიცხავ, თუმცა, თუ ეს მაინც მოხდა, არ დაზარალდება მომხმარებელი, რადგან მანამდე იაფად ყიდულობდა წყლის მეტი შემცველობის პროდუქტს. შესაბამისად, თუ კილოგრამი პროდუქტის ღირებულება გაიზრდება, ჩათვალეთ, რომ მომხმარებელი უფრო მეტ ხორცს წაიღებს სახლში, ვიდრე მანამდე“,- აღნიშნავს ზურაბ უჩუმბეგაშვილი.

წყარო:bpn.ge

ქართული ხილი, რომელიც 2019 წელს საზღვარგარეთ რეკორდული რაოდენობით გავიდა

0

ატმის, გარგარის, ალუბლის, ბლის, ქლიავის და ღოღნოშოს, ასევე ვაშლის, მსხლისა და კომშის ექსპორტმა გასულ წელს რეკორდული მაჩვენებელი შეადგინა.

ამის შესახებ ინფორმაციას საქართველოს მთავრობა ავრცელებს.

კერძოდ, მათი ცნობით, გასულ წელს ქვეყნიდან 13 მლნ აშშ დოლარის ატმის, გარგარის, ალუბლის, ბლის, ქლიავის და ღოღნოშო გავიდა ექსპორტზე, რაც რეკორდული მაჩვენებელია. ეს მონაცემი 53.2%-ით არის გაზრდილი.

რაც შეეხება ვაშლს, მსხალსა და კომშს, მათმა ექსპორტმა რეკორდული – 5 მლნ აშშ დოლარი შეადგინა. აღსანიშნავია, რომ ეს მაჩვენებელი, 210%-ით არის გაზრდილი.

„საქსტატის“ მონაცემებით, 2019 წელს საქართველოში საქონლით საგარეო სავაჭრო ბრუნვამ (არადეკლარირებული ვაჭრობის გარეშე) 12 834.7 მლნ აშშ დოლარი შეადგინა, რაც წინა წლის შესაბამის მაჩვენებელზე 2.7 პროცენტით მეტია. აქედან ექსპორტი 3 771.5 მლნ აშშ დოლარს (12.4 პროცენტით მეტი), ხოლო იმპორტი 9 063.2 მლნ აშშ დოლარს (0.8 პროცენტით ნაკლები) შეადგენს. ევროკავშირში ექსპორტის მაჩვენებელმა 825.7 მლნ აშშ დოლარი შეადგინა, რაც 2018 წელთან შედარებით, 13%-ით მეტია.

საქართველოს უარყოფითმა სავაჭრო ბალანსმა, 2019 წელს, 5 291.8 მლნ აშშ დოლარი შეადგინა, რაც საგარეო სავაჭრო ბრუნვის 41.2 პროცენტია. ამავე პერიოდში ექსპორტი რეექსპორტის გარეშე, წინა წელთან შედარებით 5.7 პროცენტით გაიზარდა და 2 352.3 მლნ აშშ დოლარი შეადგინა.

წყარო:bpn.ge